“Bakı Oksigen Kompani” ASC Azərbaycanda sağlam və təhlükəsiz əmək şəraitinin yaradılması üzrə 2022-ci ilin ən yaxşı müəssisəsi olub.
28 Aprel – Ümumdünya Əməyin Mühafizəsi Günü münasibətilə Azərbaycan Həmkarlar İttifaqları Konfederasiyasında (AHİK) tədbir keçirilib. Tədbirdə “Sağlam və təhlükəsiz əmək şəraitinin yaradılması üzrə 2022-ci ilin ən yaxşı müəssisəsi (təşkilatı)” respublika müsabiqəsinin qaliblərinin mükafatlandırılması mərasimi də baş tutub. Mərasimdə elan olunan qaliblərə diplom və qiymətli hədiyyələr təqdim edilib.
AHİK-in sədri, millət vəkili Səttar Möhbalıyev bildirib ki, qaliblər müsabiqədə iştirak edən 2150 təşkilat və müəssisə arasından seçilib.
Respublika müsabiqəsinin qalibləri sırasında “Baku Steel Company” QSC-nin tabeli müəssisəsi olan “Bakı Oksigen Kompani” ASC də olub. Mükafatı “Bakı Oksigen Kompani” ASC-nin rəhbərliyinə Əmək və əhalinin sosial müdafiəsi nazirinin müavini Anar Əliyev təqdim edib.
Xatırladaq ki, ötən il “Baku Steel Company” QSC sağlam və təhlükəsiz əmək şəraitinin yaradılması üzrə 2021-ci ilin ən yaxşı müəssisəsi seçilmişdi.
Qeyd edək ki, “Baku Steel Company” QSC-də və onun tabeli müəssisələrində sağlamlıq, əməyin təhlükəsizliyi və ətraf mühitin mühafizəsi (SƏTƏMM) sistemi yerli əmək qanunvericiliyinin tələblərinə, beynəlxalq standartlara, həmçinin sənayedəki qabaqcıl təcrübələrə əsaslanaraq qurulub.
